ОУИНБ-аас дэлхий нийтийг хамраад буй COVID-19 цар тахлаас үүдэн нислэгийн хөдөлгөөний үйл ажиллагаанд гарч буй өөрчлөлтийн талаар судалгаа тогтмол явуулж байгаа бөгөөд хэлэлцэн тохиролцогч улсууддаа тус судалгааны үр дүнг танилцуулах, нислэгийн хөдөлгөөний менежмент (НХМ)-ийн нөөц төлөвлөгөөний талаар мэдээлэл солилцох зорилгоор Ази-Номхон далайн бүсийн төвөөс тус цахим хурлыг 2 дахь удаагаа зохион байгуулсан.
2020 оны 6 дугаар сарын 26-ны өдөр зохион байгуулагдсан тус цахим хуралд Ази-Номхон далайн бүсийн улс орнууд, Франц, АНУ, IATA, CANSO болон нөөц зохицуулалтын баг (Contingency coordination team)-ын төлөөлөгч нар оролцсон.
ОУИНБ-ын Ази-Номхон далайн бүсийн НХМ/НММ-ийн (ATM/AIM) мэргэжилтэн Shane Sumner хурлыг нээсэн ба нэгдүгээр хурлаар хэлэлцсэн асуудлуудыг товч дурдан, улс орнуудаас хүргүүлсэн судалгааны үр дүнг танилцуулсан. Үүнд:
- Ази-Номхон далайн бүсийн төвөөс COVID-19 цар тахалтай холбогдуулан агаарын навигацийн үйлчилгээ үзүүлэгч байгууллагууд (ANSPs)-ын авч хэрэгжүүлж байгаа үйл ажиллагаа болон нөөц зохицуулалтын арга хэмжээний талаарх судалгаа явуулсан ба тус судалгаанд 17 улс хариу өгсөн байна. Манай улсын хувьд 2020 оны 5 дугаар сарын 14-ний өдөр Ази-Номхон далайн бүсийн төвд судалгааг хүргүүлсэн.
- Аэродром болон НХМ/агаарын зайн нөөц үйл ажиллагааны талаарх NOTAM мэдээний загварыг танилцуулсан.
- Ази-Номхон Далайн Бүсийн төвөөс COVID-19 цар тахлаас үүдэн НХМ-д гарч буй мэдээ мэдээллийг хуваалцах зорилгоор хэлэлцэн тохиролцогч улсуудынхаа НХМ-ийг хариуцсан албан тушаалтан болон нөөц зохицуулалтын багийн холбоо барих хүмүүс нэрсийг шинэчлэн, вэб сайтад байршуулсан.
COVID-19 цар тахалтай холбоотойгоор НХМ-ийн одоогийн хүчин чадал, багтаамжийн тухай судалгаанд 12 улс хариу өгсөн байна.
Мөн ОУИНБ-аас COVID-19 цар тахалтай холбоотой шийдвэр гаргагч эрх бүхий байгууллага нь хэвийн үйл ажиллагаандаа шилжих шийдвэр гаргах бол ANSP-ын бэлэн байдлыг харгалзан үзэх хэрэгтэйг зөвлөсөн. ANSP нь шийдвэр гаргагч эрх бүхий байгууллагад НХМ-ийн одоогийн хүчин чадал, бэлэн байдлын талаар мэдээлэх хэрэгтэй гэж тус судалгааны үр дүнг танилцуулах явцад сануулсан.
IATA-ын ажилтан David Michael COVID-19 цар тахал нь улс орнуудын нислэгт хэрхэн нөлөөлж байгааг тоон үзүүлэлт болон график ашиглан танилцуулсан.
- Эхний хагас жилд дэлхий дахины нислэгийн тоо 72%-иар буурсан үзүүлэлттэй байна.
- 5 дугаар сарын байдлаар Ази номхон далайн бүсийн орон нутгийн дотоодын нислэгүүд буцаж сэргэж байна.
- Урьд өмнө нь тохиолдож байсан хямралууд болох 9 сарын 11-ны үйл явдлын дараа дэлхийн километр тутам дахь зорчигчийн орлого буюу RPK индекс нь 20%-иар, шувууны ханиадны үед 12%-иар тус тус буурч байсан бол COVID-19 цар тахал дэлхий нийтэд тархсаны дараа дэлхийн RPK индекс нь 95%-иар буурсан байна.
- COVID-19 цар тахлын тодорхойгүй байдлаас шалтгаалаад агаарын тээвэрлэгч байгууллагууд өвлийн улирлын нислэгийн төлөвлөгөөгөө төлөвлөх боломжгүй байна.
- Зуны улиралд аялал жуулчлал нэмэгдэх төлөвгүй байгаа бөгөөд одоогоор нислэгийн эрэлт байхгүй байна.
- Хэвийн үед нислэгийн нийт тасалбарын 14% нь тухайн нислэг эхлэх өдрөөс 22 долоо хоногийн өмнө зарагдсан байдаг. Гэтэл COVID-19 цар тахлын улмаас нислэгийн эрэлт огцом багассанаар хол зайны нислэг (long-haul flight)-ийн эрэлт мөн буурч бараг тэгтэй тэнцүү үзүүлэлттэй байна.
Хурлын дүгнэлт:
- COVID-19 цар тахалтай холбоотой НХМ-ийн үйл ажиллагааг сэргээхэд зориулсан Ази-Номхон далайн бүсийн стратеги загварыг мөрдөж ажиллах.
- Агаарын навигацийн үйлчилгээний байгууллагууд хооронд мэдээлэл солилцож, холбоо харилцаатай байх зэргийг улс орнуудад зөвлөсөн.
- COVID-19 цар тахалтай холбоотой дараагийн цахим хурлыг зохион байгуулах тухай хэлэлцэн тохиролцогч улсуудынхаа холбогдох албан тушаалтнуудад тухай бүрт нь мэдэгдэнэ гэж Shane Sumner хурлын төгсгөлд дурдсан болно.
АННББЗГ, ИНҮТ-АНҮГ