Хөшигийн хөндий дэх “Чингис Хаан”ОУНБ-ын үйл ажиллагааг 2021 оны 7 дугаар сарын 01-нээс эхлүүлэхтэй холбогдуулан шатахуун байгууламжийн үйл ажиллагааг нарийвчлан шалгах туршилтын ажил өнөөдөр эхэллээ.

Нисэхийн аюулгүй ажиллагааг хангахад нэн тэргүүн анхаарах ёстой асуудлуудын нэг нь агаарын хөлөгт аюулгүй, найдвартай шатахуун сумлах ажлын гүйцэтгэл байдаг.Тиймээс шинэ нисэх буудлыг ашиглалтад оруулах бэлтгэл ажлын хүрээнд орчин үеийн тоног төхөөрөмж бүхий шатахуун нөөцлөх сав, тоног төхөөрөмж, агаарын хөлөгт шатахуун сумлах технологийн үйл ажиллагаа, хөдөлмөрийн аюулгүй байдал, аюулгүй ажиллагаа, ажилтнуудын ажлын уялдаа холбоо, мэдлэг, ур чадвар, туршлага, гарч болох алдаа, дутагдлыг эрт илрүүлж залруулах зэрэг зорилготойгоор Газрын тусгай үйлчилгээ, шатахуун хангалтын албаныхан бүрэн хэмжээний нарийвчилсан туршилт, тохируулгын тестийг 3 өдөр хийхээр ийнхүү эхлүүлж байгаа юм.

Өнөөдрийн туршилт, тохируулгын ажилд ИНЕГ-ын Дэд дарга Б.Алтанцом, ИНҮТ-ийн дарга П.Мөнхжаргал болон албаны бусад хүмүүс оролцсон. Шатахуун хангамжийн байгууламж нь тус бүр 2000м/куб бүхий багтаамжтай 4ш нөөцлөх савтай, терминалийн 6 зогсоолд гидрант системтэй, 1 худаг нь 1 минутанд 1000 галлон буюу 3780 литр хүртэл шатахуун шахах, 3 агаарын хөлөгт нэгэн зэрэг сумлах хүчин чадалтай.Түүнчлэн шатахууныг шинжлэх орчин үеийн технологи бүхий иж бүрэн лаборатори ажиллаж байна.