Өнөөдөр ИНЕГ болон Зэвсэгт хүчний Агаарын цэргийн командлалын хамтарсан зөвлөл анхдугаар хуралдаанаа хийлээ. Энэхүү хурлаар ИНЕГ-ын Агаарын навигаци нисэх буудлуудын бодлого зохицуулалтын газрын дарга Ч.Одгэрэлийг зөвлөлийн гишүүдийн саналаар хамтарсан зөвлөлийн даргаар сонголоо.

Мөн хуралдааны хэлэлцэх асуудлын дагуу зөвлөлийн 2022-2023 оны үйл ажиллагааны төлөвлөгөөг хэлэлцэж, иргэний болон цэргийн үйл ажиллагаанд Монгол Улсын агаарын зайг хэрхэн ашиглах тухай Засгийн газрын 2019 оны 455 дугаар тогтоолын дагуу Буянт-Ухаа олон улсын нисэх буудлаас Налайхын цэргийн ангийн бүсэд Миг-29 агаарын хөлгөөр сургалт дадлагын нислэг үйлдэхэд тулгарч буй асуудлуудыг шийдвэрлэх тухай хэлэлцэж холбогдох шийдвэрүүдийг гаргаж үйл ажиллагааг саадгүй зохион байгуулахаар харилцан тохиролцлоо.