“Emirates” компани саяхан Индонезийн “Batik Air” компанитай код хуваалцах түншлэлээ идэвхжүүлж, нэг тасалбар, нэг тээшний бодлогоор Индонезийн 25 чиглэлд нэвтрэх боломжоор үйлчлүүлэгчдийнхээ сонголтыг өргөжүүлэв.

Шинээр идэвхжүүлсэн гэрээний дагуу “Emirates” нь “Batik Air” компаниас Жакартагаар дамжин Баликпапан (BPN), Денпасар (DPS), Медан (KNO), Манадо (MDC), Паданг (PDG), Суракарта (SOC), Сурабая (SUB) болон Макассар (UPG) хүртэлх 8 чиглэлд кодоо байршуулсан байна. Нэмж дурдахад “Emirates”-ын үйлчлүүлэгчид интерлайн гэрээгээр Жакарта, Денпасараар дамжин Прая (LOP), Семаранг (SRG), Соронг (SOQ) гэх мэт хотууд руу Индонезийн дотоодын 17 чиглэл рүү хялбархан нэвтрэх боломжтой болж байгаа юм.

“Emirates” компани нь 1992 онд Жакарта руу анхны нислэгээ хийснээс хойш 30 гаруй жилийн турш Индонез улсад үйлчилж байна. Тус компани нь олон улсын жуулчид, бизнес аялагчдыг тээвэрлэж, Индонезийн аялал жуулчлал, худалдааны салбарыг сэргээн хөгжүүлэхэд хувь нэмрээ оруулсаар байна. Энэ оны эхээр “Emirates” Индонезийн үндэсний агаарын тээвэрлэгч “Garuda”-тай код хуваалцах гэрээг байгуулж, үйлчлүүлэгчиддээ Жакарта, Балигаас цааш Индонезийн найман цэгт нэвтрэх боломжийг олгосон.

“Emirates” нь одоогоор дэлхий даяар 26 агаарын тээврийн түнш, хоёр төмөр замын компани, түүнчлэн дэлхий даяар 110 интерлайн түншүүдтэй хамтын ажиллагааны гэрээ байгуулан ажиллаж байна. Тус компани 6 тивийн 130 гаруй чиглэлд нислэг үйлдэж буй дэлхийн хамгийн хүчирхэг агаарын тээвэрлэгчдийн нэг юм.