Зам, тээврийн хөгжлийн сайд С.Бямбацогт, Бүгд Найрамдах Грек Улсын Дэд бүтэц, тээврийн сайд Кристос Стайкорас нар 2023 оны 8 дугаар сарын 23-ны өдөр Агаарын харилцааны тухай Монгол Улсын Засгийн газар, Бүгд Найрамдах Грек Улсын Засгийн газар хоорондын хэлэлцээрт гарын үсэг зурж эцэслэн байгууллаа.

Агаарын харилцааны тухай Монгол Улсын Засгийн газар, Бүгд Найрамдах Грек Улсын Засгийн газар хооронд байгуулах хэлэлцээрийн төслийг талууд 2018 оны 12 дугаар сард үзэглэж, Монгол Улсын Ерөнхий сайдын 2023 оны 08 дугаар сарын 09-ний өдрийн 131 дугаар захирамжаар хэлэлцээрт гарын үсэг зурах эрхийг Зам, тээврийн хөгжлийн сайд С.Бямбацогтод олгосон.

Уг хэлэлцээр байгуулагдсанаар хоёр улсын агаарын тээвэрлэгчид шууд болон коммерын хамтын ажиллагааны хүрээнд нислэг үйлдэх боломж бүрдэх бөгөөд цаашид Европын орнууд руу шинээр нээх нислэгийн завсрын цэг болгон ашиглах боломж бий.

 Бүгд Найрамдах Грек Улс нь Европ тивдээ агаарын тээврийн 8 дахь том зах зээл бөгөөд нислэгийн сүлжил 2013-2018 онд 106%-иар өссөн байна. Тус улсад 39 олон улсын нисэх онгоцны буудлууд байдаг бөгөөд Афины Eleftherios Venizelos, Салоники дахь Македон, Крит дэх Ираклионы “Никос Казанцакис” олон улсын нисэх онгоцны буудлууд нь хамгийн том нисэх буудлууд бөгөөд нийт 39 нисэх буудлаас 55 улсын 165 чиглэлд нислэг үйлдэгдэж байна.

Грекийн агаарын тээврийн салбар улсынхаа эдийн засагт томоохон хувь нэмэр оруулдаг бөгөөд Олон улсын агаарын тээврийн холбоо IATA-ноос гаргасан мэдээллээр 2017 онд агаарын тээвэр нь 25,5 сая зорчигч тээвэрлэж, 19,7 тэрбум ам.доллар буюу дотоодын нийт бүтээдэхүүний 10,2 хувийг агаарын тээврийн салбар бүрдүүлсэн бөгөөд шууд 41,000 ажлын байр, шууд бусаар 457,000 ажлын байраар хангадаг байна.