НЭГ. Тэтгэлгийн зорилго: Зам, тээврийн салбарын мэргэжлээр суралцагчдыг нэмэгдүүлэх, хөгжүүлэх, урамшуулах, дэмжих, сурталчлах, салбарын боловсон хүчнийг бэлтгэхэд оршино.

ХОЁР. Тэтгэлгийн хэмжээ: Жил бүр сургалтын тэтгэлэг авах эрх үүссэн 100 хүртэлх оюутанд 2.000.000 /хоёр сая/ төгрөгийн тэтгэлэг тус бүр олгоно.

ГУРАВ. Бүртгүүлэгчдэд тавигдах үндсэн шаардлага:

Өмчийн хэлбэр үл харгалзан гадаад дотоодын бакалавр, магистр, доктор, МСҮТ-д суралцаж байгаа суралцагчдад хамаарна.

Тэтгэлэгт хамрагдах суралцагч нь дараах шаардлагыг хангасан байна. Үүнд:

– Суралцагч нь сүүлийн 2 улирал 3.2 болон түүнээс дээш голч оноотой үнэлэгдсэн байх;

– Зохион бүтээсэн багаж төхөөрөмж, эрдэм шинжилгээний илтгэл нь уралдаан тэмцээнд шалгарсан бол давуу тал болно.

– Сургалтын тэтгэлэг авах эрх үүссэн тохиолдолд оюутанд тэтгэлгийг олгоно.

– Суралцагч тэтгэлэг авсан эсэхээс үл хамааран дараагийн жилийн сонгон шалгаруулалтад оролцох эрхтэй.

ДӨРӨВ. Бүрдүүлэх материал:

– Иргэний үнэмлэхийн хуулбар;

– Тэтгэлэгт хамрагдахаа илэрхийлсэн оюутны хувийн өргөдөл;

– Оюутны талаарх мэдээллийг агуулсан анкет;

– Суралцаж буй сургуулийн тодорхойлолт;

– Суралцсан хугацааны сурлагын дэлгэрэнгүй дүнгийн жагсаалт /сүүлийн 2 улирал/, амжилтыг тодорхойлсон баримт бичиг;

– Сургалтын төлбөр төлсөн баримт;

– Бусад байдлыг нотлох баримт (өнчин, эцэг эх нь хөгжлийн бэрхшээлтэй, хөдөлмөрийн чадвараа алдсан г.м) хорооны засаг даргын тодорхойлолтоор баталгаажуулсан байх.

ТАВ. Сонгон шалгаруулалтын бүртгэл болон зохион байгуулалтын хугацаа: Сонгон шалгаруулалтад оролцох иргэд 2023 оны 08 дугаар сарын 21-ний өдрийн 09.00 цагаас 09 дүгээр сарын 20-ны өдрийн 17.00 цаг хүртэл Зам, тээврийн хөгжлийн яамны https://digital.mrtd.gov.mn/support/detail/… цахим хуудаст бүрдүүлэх материалыг хавсаргаж илгээнэ.

Жич: Зөвхөн онлайнаар бүртгэл явагдана. Онлайн бүртгэлийн хугацаа дуусахаас өмнө бүртгүүлсэн материалаа ИЛГЭЭХ товчин дээр дарж баталгаажуулахыг анхаарна уу.

ЗУРГАА. Тэтгэлэг горилогчийн анхаарах зүйлс:

– Тэтгэлэгтэй холбоотой баримт бичгийг хуурамчаар бүрдүүлсэн, суралцагчийн мэдээллийг буруу гаргасан буюу сурлагын үнэлгээг бодит бусаар үнэлсэн нь тогтоогдвол буруутай этгээдэд холбогдох хууль тогтоомжид заасны дагуу хариуцлага хүлээлгэнэ.

– Сонгон шалгаруулалттай холбоотой маргааныг сургалтын асуудал хариуцсан зөвлөл шийдвэрлэнэ.

Холбоо барих: Ажлын өдрүүдэд 14.00-17.00 цагийн хооронд 51-263171 дугаарын утсаар холбогдох боломжтой.