Олон улсын иргэний нисэхийн байгууллага болон Катар Улсын Засгийн газрын хооронд байгуулсан санамж бичгийн хүрээнд хөгжиж буй орнуудаас нийт 5 (тав) суралцагчийг Катар Улсад хоёр жилийн тэтгэлэгт дипломын сургалтад хамруулах сонгон шалгаруулалтыг ИКАО-аас зарласан. Уг тэтгэлэгт хөтөлбөрт ИНЕГ-аас нэгдсэн журмаар тодорхойлж, сонгон шалгаруулалтад оролцох боломжийг олгох зорилгоор та бүхэнд энэхүү зарыг хүргүүлж байна.

Тэтгэлэгт хөтөлбөрийн нөхцөл болон тавигдах шаардлага:

Сургалтын чиглэл:

• Нисгэгч (Commercial Pilot Licence (CPL) with Multi-Engine Class Rating, and Instrument (IR);
• Нислэгийн хөдөлгөөний удирдагч
• Агаарын хөлгийн техник үйлчилгээний инженер;
• Ахисан түвшний нисэхийн менежмент;
• Цаг уурын ажилтан.

Тэтгэлэгт хөтөлбөрт багтсан зардлууд:

• Сургалтын төлбөр;
• Суралцах хугацаанд байрлах байр;
• Дадлага хийх үед гарах тээврийн зардал;
• Монгол-Катар тээврийн зардал.

Сонгон шалгаруулалтад хамрагдах хүсэлт гаргагчдад тавигдах шаардлага:

• 18 насанд хүрсэн, Монгол Улсын иргэн байх;
• Иргэний нисэхийн салбарт үйл ажиллагаа явуулдаг байгууллагын ажилтан байх;
• IELTS-ийн албан ёсны 6.0-аас доошгүй оноотой, онооны хүчинтэй хугацаа дуусаагүй байх; /Хүчинтэй хугацаа дуусаагүй TOEFL шалгалтын албан ёсны оноог мөн дүйцүүлж болно/.
• Эрүүл мэндийн шаардлага хангасан байх.

Бүрдүүлэх материал:

• Хавсаргасан сонгон шалгаруулалтын анкетыг бөглөх /ЭНД ДАРЖ ТАТАЖ АВНА УУ/
• Их, дээд сургуулийн дипломын хуулбар, хэрэв суралцаж буй бол сургуулийн тодорхойлолт;
• Ажлын газрын тодорхойлолт;
• Иргэний үнэмлэхний хуулбар /E-Mongolia-аас авах/;
• Эсээ /Хэрэв сонгон шалгаруулалтад тэнцэж, Катар Улсад суралцвал таны болон Монгол Улсын хувьд ямар эерэг үр дүн гарах талаар 1500-аас доошгүй үгтэй эсээ англи хэл дээр бичих/;
• TOEFL, эсвэл IELTS-ийн албан ёсны оноо;
• Бүрэн дунд боловсролын гэрчилгээний хуулбар;
• УБ Сонгдо эмнэлэг, эсвэл Улсын гуравдугаар төв эмнэлгийн эрүүл мэндийн үзлэгээр орж, эрүүл мэндийн үзлэгийн хуудсыг ерөнхий эмчийн гарын үсэг зуруулан, тамга тэмдэг даруулсан байна (нисгэгч: эрүүл мэндийн 1-р зэрэглэлийн шаардлага хангасан байх, нислэгийн хөдөлгөөний удирдагч: эрүүл мэндийн 3-р зэрэглэлийн шаардлага хангасан байх).

Сонгон шалгаруулалтын материал хүлээн авах хугацаа:

Сонгон шалгаруулалтад хамрагдах хүсэлт гаргагчдын материалыг 2023 оны  10 дугаар сарын 23-ны өдрөөс 10 дугаар сарын 30-ны өдрийн 10:00 цаг хүртэл Нисэхийн сургалтын төвийн 205 тоот өрөөнд хүлээн авна. Ирүүлсэн материалд ИНЕГ-ын даргын тушаалаар томилогдсон ажлын хэсгийн гишүүд тавигдсан шалгуурын дагуу сонгон шалгаруулалт хийж, удирдлагад танилцуулна.

Асууж тодруулах зүйл байвал zoljargal.a@mcaa.gov.mn болон ажлын өдрүүдэд, ажлын цагаар 71283314, 88644600 утсаар холбогдон мэдээлэл авна уу.